Għada jibda wieħed mill-aktar appuntamenti ta’ solidarjetà mistennija tas-sena hekk kif id-Dar ta’ San Ġużepp f’Santa Venera tilqa’ l-24 edizzjoni tal-Maratona Oħloq Tbissima. Għal 60 siegħa bla waqfien, Malta se tkun qed tingħaqad f’inizjattiva li ilha għal kważi kwart ta’ seklu tibdel il-ġenerożità tal-poplu f’għajnuna konkreta għal min għandu bżonnha.
Il-maratona ta’ din is-sena se tiffoka fuq żewġ oqsma ewlenin: il-ħidma tal-MSSP fil-Perù, il-Pakistan u l-Filippini, u l-appoġġ kontinwu lid-Dar ta’ San Ġużepp f’Santa Venera. Din id-dar toffri ambjent sigur lil tfal u żgħażagħ li, minħabba ċirkostanzi diffiċli, ma jistgħux jgħixu mal-familji tagħhom.
Fost il-proġetti li għandhom jibbenefikaw mill-fondi miġbura hemm it-tlestija ta’ tliet appartamenti ġodda għal dawk iż-żgħażagħ li, meta jagħlqu t-18-il sena, ikunu qed jagħmlu l-ewwel passi lejn ħajja aktar indipendenti.
Fr Louis Mallia MSSP, Direttur ta’ Dar San Ġużepp, spjega li l-għan mhuwiex biss li dawn iż-żgħażagħ ikollhom fejn jgħixu, iżda li jingħataw l-appoġġ meħtieġ waqt din il-bidla importanti f’ħajjithom.
“L-għan tagħna huwa li dawn iż-żgħażagħ, meta ma jkunux jistgħu jibqgħu jgħixu hawn, ikollhom l-ispazju u l-post tagħhom. Dawk li jmorru l-Università se jkollhom bżonn l-indipendenza, iżda fl-istess ħin se jkomplu jibbenefikaw mill-mentoring u l-appoġġ tagħna,” qal Fr Louis.
Il-ħidma li tappoġġja Oħloq Tbissima ma tieqafx mal-kosta Maltija. Permezz tal-fondi miġbura, il-missjunarji Maltin ikomplu jaħdmu ma’ komunitajiet vulnerabbli fil-Perù, il-Pakistan u l-Filippini, fejn l-għajnuna tinbidel f’opportunitajiet ta’ edukazzjoni, kura tas-saħħa u appoġġ soċjali.
Fr Louis enfasizza li din il-ħidma titlob impenn kontinwu u li l-ġenerożità tal-poplu Malti tagħmel possibbli li dawn il-proġetti jibqgħu għaddejjin.
“Il-missjunarji qatt ma jaqtgħu qalbhom. Huma jkomplu jaħdmu b’imħabba u solidarjetà. Aħna nemmnu fil-Providenza Divina. Kull ma jinġabar matul dan il-weekend huwa frott il-Providenza,” qal Fr Louis.
Matul it-tlett ijiem tal-maratona, il-pubbliku se jkun jista’ mhux biss isegwi x-xandir dirett, iżda wkoll iżur id-Dar ta’ San Ġużepp u jkun parti mill-atmosfera tal-avveniment. Se jkun hemm programm mimli divertiment, artisti, attivitajiet għall-familji u kollegamenti diretti mal-missjunarji Maltin li se juru kif l-għajnuna li tasal minn Malta tħalli impatt fuq il-ħajja ta’ ħafna persuni.
Għada ma tibdiex biss maratona televiżiva. Tibda opportunità biex komunità sħiħa terġa’ turi li ġest wieħed ta’ ġenerożità jista’ jasal ‘il bogħod ħafna – minn Malta sal-Perù, il-Pakistan u l-Filippini, u fil-ħajja ta’ dawk li qed jistennew tama ġdida.
Il-maratona se tixxandar fuq l-istazzjonijiet lokali mill-Ġimgħa 10 sal-Ħadd 12 ta’ Lulju bejn l-4pm u l-11pm. Minbarra l-maratona televiżiva, il-pubbliku huwa mistieden jingħaqad personalment fid-Dar ta’ San Ġużepp, fejn kull filgħaxija bejn is-7.30pm u l-10.30pm se jkun hemm spettaklu ta’ varjetà, ikel tajjeb u xorb f’atmosfera ta’ festa u solidarjetà. Oħloq Tbissima 2026 tibda għada u se tixxandar għal 60 siegħa fuq TVM, ONE, NET u F Living. Dawk li jixtiequ jagħtu s-sehem tagħhom jistgħu jagħmlu donazzjoni permezz tal-linji ddedikati tal-maratona jew online permezz ta’ Oħloq Tbissima