Il-maltemp qawwi tat-Tempesta Harry li ħakem lil Malta f’dawn l-aħħar jiem jfakkarna b’mod qawwi kemm in-natura għandha saħħa li tmur lil hinn mill-kontroll tagħna.

Siġar imġarrfa, baħar imqalleb u servizzi mwaqqfa jfakkruna li, minkejja l-avvanzi teknoloġiċi u l-kumdità li bnejna, aħna għadna żgħar quddiem il-ħolqien.

Għal ħafna minna, in-natura saret biss sfond: xi ħaġa li naraw minn tieqa, jew ostaklu meta tfixkel il-pjanijiet tagħna. Din il-maltempata, però, ġġegħelna nieqfu u nisma’.

Fil-viżjoni Kattolika, in-natura mhijiex sempliċiment sett ta’ riżorsi jew forzi każwali. Hija parti mill-ħolqien ta’ Alla, kelma ħajja li titkellem dwar il-preżenza u s-setgħa tiegħu.

Fil-Ktieb tal-Ġenesi naqraw li Alla ra li dak kollu li ħalaq kien tajjeb. Meta r-riħ jgħajjat u l-baħar jitqajjem, ma narawx biss kaos, imma wkoll tifkira li Alla mhux marbut mal-kumditajiet tagħna. Huwa akbar minna, u l-ħolqien tiegħu jsejħilna għall-umiltà.

Illum, ħafna minna nħossuna maqtugħin min-natura. Ngħixu f’ritmu mgħaġġel, f’konkrit u skedi mimlija, u ninsew li aħna wkoll parti minn dan il-ħolqien. Meta maltemp bħal dan iwaqqafna, jista’ jkun mument ta’ grazzja: stedina biex nerġgħu niskopru r-rabta tagħna mad-dinja u ma’ Alla. Il-Papa Franġisku, fl-enċiklika Laudato Si’, ifakkarna li l-kura tal-ħolqien hija wkoll att ta’ fidi.

It-Tempesta Harry, minkejja l-ħsara li ġab miegħu, jista’ jkun sejħa għall-konverżjoni. Jistedinna nerġgħu nitgħallmu nħarsu lejn in-natura b’għożża u rispett, u permezz tagħha, nerġgħu nsibu lil Alla li jitkellem fil-kwiet u wkoll fil-maltemp.