Almudena Martínez-Bordiú via Catholic News Agency

Il-Papa Franġisku sellem għall-aħħar darba lill-fidili madwar id-dinja mill-Bażilika ta’ San Pietru fl-aktar jum importanti għall-insara: l-Għid, qalb u pedament tal-fidi Kattolika li tħabbar it-trijonf ta’ Kristu fuq id-dnub u l-mewt.

Fl-20 ta’ April filgħodu, qabel għexieren ta’ eluf ta’ pellegrini nġabru fi Pjazza San Pietru, il-Papa Franġisku deher mill-loggia ċentrali tal-bażilika biex iwassal il-messaġġ tiegħu tal-Għid.

Wiċċu mmarkat mill-għeja u leħnu miksur bid-diffikultà tiegħu biex jieħu n-nifs, is-Santu Missier bi sforz kbir wassal dik li kienet se tkun l-aħħar barka tiegħu: “Għeżież ħuti: l-Għid it-Tajjeb!” Ġurnata wara, filgħodu tal-21 ta’ April, il-Papa Franġisku miet fl-età ta’ 88 sena.

Fil-messaġġ tiegħu tal-Għid, moqri l-Ħadd mill-Arċisqof Diego Ravelli, surmast taċ-ċerimonji pontifikali, is-Santu Missier esprima x-xenqa profonda tiegħu għall-paċi u ttama “li l-prinċipju tal-umanità bħala l-assi kardinali tagħha qatt ma jonqos”.

“F’dan il-jum, nixtieq li għal darb’oħra nittamaw u nafdaw f’oħrajn – anke dawk li mhumiex qrib tagħna jew li ġejjin minn artijiet imbiegħda, b’drawwiet, stili ta’ ħajja, ideat, u drawwiet differenti minn dawk li aħna l-aktar familjari magħhom – għax aħna lkoll ulied Alla,” esprima l-Papa Franġisku.

Fi tmiem il-messaġġ tiegħu, il-pontifikat ta lill-fidili waħda minn dawk is-“sorpriżi” li kkaratterizzaw l-aħħar jiem tal-pontifikat tiegħu minn meta ħareġ mill-Isptar Gemelli f’Ruma fit-23 ta’ Marzu.

Il-Papa Franġisku għamel iċ-ċirkwit tal-pjazza ppakkjata għal madwar 20 minuta, sellem lill-35,000 fidil b’affezzjoni u sħana mill-papamobile, il-folla tirreċiproka b’applaws u ferħ, xena maqbuda għall-posterità.

Mill-ħruġ tiegħu mill-isptar, il-Papa Franġisku deher fil-pubbliku f’diversi okkażjonijiet, dejjem bla mistenni, mingħajr aġenda pubblika uffiċjali.

Għalkemm ma kienx mistenni li jilqa’ gruppi kbar jew jagħmel udjenzi waqt il-konvalexxenza tiegħu, reġa’ deher għall-ewwel darba fis-6 ta’ April biex jipparteċipa fil- Ġublew tal-Morda.

Huwa kellu wkoll laqgħa privata mal-monarki Ingliżi wara li tħassret iż-żjara uffiċjali tagħhom fil-Vatikan, u fl-10 ta’ April, issorprenda lil kulħadd bi żjara, mingħajr ilbies papali, fil-Bażilika ta’ San Pietru biex jitlob fil-qabar ta’ San Piju X.

Is-Santu Missier żar ukoll il-Bażilika ta’ Santa Marija l-Maġġuri f’Ruma biex jitlob quddiem l-ikona ta’ Marija Bambina, “Salus Populi Romani” (“Ħarsien tal-Poplu Ruman”), lejha dejjem kellu devozzjoni kbira. Nhar Ħadd il-Palm , seta’ jidher mingħajr kannuli nażali jsellem lill-kardinali u fidili fi tmiem il-quddiesa.

Ħames ijiem ilu biss, huwa żar il-ħabs Regina Coeli ta’ Ruma wara nofsinhar tal-Ħamis il-Kbira biex jiltaqa’ ma’ 70 priġunier. Reġa’ deher ukoll fil-bażilika tal-Vatikan nhar is-Sibt Imqaddes biex ikun qrib il-fidili li kienu se jiċċelebraw il-Velja tal-Għid.

Barra minn hekk, fis-16 ta’ April, huwa rċieva fil-Vatikan 70 membru tat-timijiet mediċi tal-Isptar Gemelli biex jirringrazzjahom tal-kura tagħhom waqt l-isptar.

Traduzzjoni mħejjija u adattata minn Lara Zammit għal tbissima.mt. It-test oriġinali bl-Ingliż jappartjeni lill-Catholic News Agency. Ritratti kollha via Catholic News Agency Access for Editors.