Kristina Millare via Catholic News Agency
Waqt li jimmarka ieħor f’sensiela ta’ dehriet pubbliċi sorpriża riċenti, il-Papa Franġisku nhar il-Ħadd sellem fil-qosor eluf ta’ pellegrini miġburin fi Pjazza San Pietru biex jiċċelebraw Ħadd il-Palm.
“Nixtiqilkom Ħadd il-Palm u bidu tal-Ġimgħa Mqaddsa mill-isbaħ!” qal is-Santu Missier b’xi diffikultà għall-ferħ tal-folla kbira li mliet il-pjazza u nxterdet tul il-Via della Conciliazione.
Il-ponti ta’ 88 sena ma setax jipparteċipa fil-Quddiesa ta’ Ħadd il-Palm peress li kien għadu qed jirkupra wara attakk serju ta’ pnewmonja doppja li żammitu l-isptar għal 39 jum. Wasal f’siġġu tar-roti lejn tmiem il-liturġija ta’ barra, jitbissem u mingħajr tubi tal-imnieħer waqt li għadda minn ħdejn il-kleru, reliġjużi u nisa bilwieqfa, u ħdejn l-artal.
Il-Kardinal Leonardo Sandri, viċi dekan tal-Kulleġġ tal-Kardinali, ippresieda l-Quddiesa bħala delegat tal-Papa u qara l-omelija bil-miktub tal-Papa lill-folol ta’ nies ixejru pali u friegħi taż-żebbuġ taħt smewwiet imsaħħab.
Fl-omelija ppreparata tiegħu, il-Papa ħeġġeġ lill-insara biex “jesperjenzaw il-miraklu kbir tal-ħniena” billi jakkumpanjaw lil Ġesù fil-vjaġġ tiegħu lejn is-salib.
“Ejja niddeċiedu kif aħna maħsuba biex inġorru s-salib tagħna stess matul din il-Ġimgħa Mqaddsa: jekk mhux fuq spallejna, f’qalbna,” qal il-Papa. “U mhux biss is-salib tagħna, imma wkoll is-salib ta’ dawk li jbatu madwarna.”
L-omelija tal-Papa Franġisku ffukat fuq Xmun ta’ Ċirene li, fl-evanġelju ta’ San Luqa, “b’mod mhux mistenni sab ruħu maqbud fi drama” tat-tislib ta’ Kristu.
“Hekk kif nimxu lejn il-Kalvarju, ejjew nirriflettu għal mument fuq l-azzjonijiet ta’ Xmun, nippruvaw inħarsu lejn qalbu, u nimxu fuq il-passi tiegħu ħdejn Ġesù,” osserva l-Papa.
Għalkemm ir- raġel minn Ċirene ma ħax is- salib taʼ Ġesù u mxi warajh minħabba “konvinzjoni” imma, pjuttost, taʼ “ġegħil,” il- Missier Imqaddes faħħarh talli kien preżenti biex jgħin lil Ġesù li qed ibati u, b’“mod mhux mistenni u tal-għaġeb,” isir “parti mill- istorja tas- salvazzjoni.”
“Bejnu u Ġesù, m’hemmx djalogu; ma titkellem ebda kelma waħda. Bejnu u Ġesù, hemm biss l-injam tas-salib,” kiteb il-Papa.
“Meta naħsbu f’dak li għamel Xmun għal Ġesù, għandna naħsbu wkoll f’dak li għamel Ġesù għal Xmun – dak li għamel miegħi, għalik, għal kull wieħed minna: hu fdien lid-dinja,” żied jgħid.
Filwaqt li enfasizza l-imħabba infinita ta’ Kristu li, “b’ubbidjenza lejn il-Missier,” ġarret id-dnubiet tal-umanità kollha, il-Papa enfasizza li l-insara jemmnu f’Alla li “sofra magħna u għalina”.
“Ejja niftakru li Alla għamel din it-triq post ta’ fidwa, għax mexa minnha hu stess, ta ħajtu għalina,” ħeġġeġ il-Papa.
Messaġġ tal-Angelus
Fid-diskors tiegħu tal-Angelus ta’ Ħadd il-Palm maħruġ mill-Vatikan, is-Santu Missier talab lill-insara jkomplu jitolbu għal dawk li qed ibatu fid-dinja minħabba l-gwerra, il-faqar, u d-diżastri.
“Il-15 ta ‘April se jimmarka t-tieni anniversarju diqa mill-bidu tal-kunflitt fis-Sudan, li fih eluf inqatlu u miljuni ta’ familji ġew sfurzati jaħarbu minn djarhom,” qal fil-messaġġ tiegħu.
“It-tbatija tat-tfal, nisa u nies vulnerabbli tgħajjat lejn is-sema u titlobna naġixxu,” żied jgħid.
Nhar il-Ġimgħa, paramilitari Sudaniżi qatlu l-istaff kollu ta’ disa’ membri tal-aħħar klinika medika f’kamp tar-refuġjati fir-reġjun tal-punent tad-Darfur, is-Sudan, skont rapport fin-New York Times, li jsemmi gruppi ta’ għajnuna u n-Nazzjonijiet Uniti. B’kollox, mill-inqas 100 persuna nqatlu f’attakk fuq il-kamp, li huwa popolat minn nofs miljun ruħ spostati mill-gwerra ċivili tal-pajjiż, qal ir-rapport.
Filwaqt li nnota gwerer ċivili oħra li kienu għaddejjin li jaffettwaw popolazzjonijiet fl-Afrika, fil-Lvant Nofsani, fl-Ewropa u fl-Asja, il-Papa talab lin-nies biex jitolbu għall-paċi fil-Kongo, is-Sudan t’Isfel, il-Libanu, il-Palestina, l-Iżrael u l-Myanmar.
Fl-indirizz tiegħu, is-Santu Missier talab ukoll lin-nies biex jiftakru fil-vittmi u l-familji tad -diżastru ta’ Santo Domingo, fir-Repubblika Dominikana, li qatel aktar minn 200 persuna wara li fit-8 ta’ April waqa’ saqaf ta’ nightclub.
“Jalla Marija, Omm id-Duluri, tikseb din il-grazzja għalina u tgħinna ngħixu din il-Ġimgħa Mqaddsa bil-fidi,” qal il-Papa Franġisku.
Fir-ritratt: Papa Franġisku li jitbissem jasal fi Pjazza San Pietru fit-13 ta’ April, 2025, fi żjara sorpriża fi tmiem il-quddiesa ta’ Ħadd il-Palm fil-beraħ. Kreditu: Bénédicte Cedergren/CNA
Traduzzjoni mħejjija u adattata minn Lara Zammit għal tbissima.mt. It-test oriġinali bl-Ingliż jappartjeni lill-Catholic News Agency.