Marco Mancini, Veronica Giacometti via EWTN News
Mill-katidral Kattoliku ta’ Bamenda nhar il-Ħamis, il-Papa Ljun XIV ħeġġeġ kemm lill-Insara kif ukoll lill-Musulmani biex ifejqu l-feriti tal-kunflitt fil-Kamerun.
Meta Ljun wasal fil-Katidral ta’ San Ġużepp, fir-raba’ jum tal-vjaġġ tiegħu fl-Afrika, l-ewwel żar il-Kappella tas-Sagrament Imqaddes għal mument ta’ talb flimkien mal-Arċisqof Andrew Nkea Fuanya ta’ Bamenda.
Waqt il-laqgħa interreliġjuża għall-paċi, Nkea qal li l-preżenza tal-Papa kienet ta’ konsolazzjoni għan-nies. Il-laqgħa inkludiet testimonjanzi minn nies lokali, inklużi Kattoliċi, Protestanti, u Musulmani.
“Missier Qaddis, għinna biex ikollna l-paċi,” qal l-Imam Mohammad Abubakar tal-Moskea Ċentrali ta’ Buea wara li tkellem dwar episodji vjolenti li seħħew fis-snin riċenti.
“Huwa ta’ ferħ għalija li ninsab magħkom f’dan ir-reġjun li sofra tant. Kif għadhom kif urew ix-xhieda tagħkom, l-esperjenza tat-tbatija li għexet il-komunità tagħkom saħħet biss il-konvinzjoni tagħkom li Alla qatt ma abbandunana! F’Alla, fil-paċi tiegħu, nistgħu dejjem nibdew mill-ġdid!” qal il-Papa.
“Jalla lkoll inkomplu fit-triq tat-tjubija li twassal għall-paċi,” kompla jgħid. “Jiena grat għall-kliem ta’ merħba tiegħek, għax huwa veru: Jiena hawn biex inxandar il-paċi. Madankollu nsib li intom qed txandru l-paċi lili, u lid-dinja kollha.”
Ljun faħħar ix-xhieda tal-Musulmani u l-Insara lokali fil-ħidma tagħhom għall-paċi u qal li jixtieq li “dan iseħħ f’ħafna postijiet oħra tad-dinja.”
“Ġesù qalilna: Henjin dawk li jġibu l-paċi! Imma ħażin għal dawk li jimmanipulaw ir-reliġjon u l-istess isem ta’ Alla għall-gwadann militari, ekonomiku jew politiku tagħhom stess, u jkaxkru dak li hu sagru fid-dlam u l-ħmieġ,” qal Ljun.
Il-Qdusija Tiegħu esprima wkoll il-gratitudni tiegħu lill-lajċi u lin-nisa reliġjużi kollha li jieħdu ħsieb dawk li ġew trawmatizzati mill-vjolenza — xogħol perikoluż u li ma jidhirx.
“L-imgħallmin tal-gwerra jippretendu li ma jafux li tieħu biss mument biex teqred, iżda ħajja sħiħa ħafna drabi mhix biżżejjed biex terġa’ tinbena,” qal. “Irridu nagħmlu bidla deċiżiva fir-rotta — konverżjoni vera — li twassalna fid-direzzjoni opposta, fuq triq sostenibbli rikka fil-fraternità umana.”
“Il-paċi mhix xi ħaġa li rridu nivvintaw: Hija xi ħaġa li rridu nħaddnu billi naċċettaw lill-proxxmu tagħna bħala ħuna u oħtna. Ma nagħżlux lil ħutna: Irridu sempliċement naċċettaw lil xulxin!” ħeġġeġ.
Il-Papa qal: “Ejjew nimxu flimkien, fl-imħabba, infittxu dejjem il-paċi.”
Barra l-katidral fi tmiem il-laqgħa, il-Papa Ljun, akkumpanjat minn rappreżentanti tal-komunità ta’ Bamenda, ħareġ seba’ ħamiem bħala sinjal ta’ paċi.
“Għeżież ħuti, illum il-Mulej għażilna lkoll biex inkunu ħaddiema li jġibu l-paċi f’din l-art! Ejjew ilkoll ngħidu talba lill-Mulej, li l-paċi tassew isaltan fostna, li hekk kif inħelsu dawn il-ħamiem bojod — simbolu tal-paċi — li l-paċi t’Alla tkun fuqna lkoll, fuq din l-art, u żżommna lkoll magħqudin fil-paċi tiegħu. Ifaħħru lill-Mulej!” qal.