Walter Sánchez Silva via Catholic News Agency
Pellegrini minn madwar id-dinja qed jgħaddu mill-Bieb Qaddis miftuħ tal-Bażilika ta’ San Pietru, li l-Papa Franġisku fetaħ lejlet il-Milied biex jibda l-Ġublew tal-2025.
Il-fidili minn partijiet differenti tad-dinja u minn oqsma differenti tal-ħajja diġà għaddew mill-Bieb Qaddis miftuħ li jissimbolizza lil Kristu.
Fil-messaġġ tiegħu ta’ Jum il-Milied, il-Papa Franġisku fakkar li “il-bieb ta’ qalb Alla huwa dejjem miftuħ; ejjew nerġgħu lura għandu. Ejjew nerġgħu lura lejn il-qalb li tħobbna u taħfrilna.”
“Ejjew inħallu lilna nfusna nkunu maħfura minnu, ejjew inħallu lilna nfusna nkunu rikonċiljati miegħu. Alla jaħfer dejjem, Alla jaħfer kollox; ejjew inħallu lilna nfusna nkunu maħfura minnu,” ħeġġeġ il-Missier.
“Dan hu t-tifsira tal-Bieb Imqaddes tal-ġublew,” enfasizza l-Papa Franġisku. “Jirrappreżenta lil Ġesù, il-bieb tas-salvazzjoni miftuħ għal kulħadd.”
“Ġesù huwa l-bieb li l-Missier ħanin fetaħ f’nofs id-dinja, f’nofs l-istorja, biex ilkoll kemm aħna nkunu nistgħu nerġgħu lura lejh,” żied jgħid.
“Ħuti, tibżgħux. Il-bieb huwa miftuħ, miftuħ beraħ. M’hemmx għalfejn iħabbtu,” qal il-Papa, biss biex jgħaddi minnu.
Nhar il-Ħamis infetaħ ukoll il-Bieb Imqaddes fil-ħabs ta’ Rebibbia. Fil-jiem li ġejjin, f’Ruma qed jinfetħu wkoll Bibien Mqaddsa oħra.
Id-dati tal-ftuħ tal-Bibien Mqaddsa tat-tliet bażiliċi papali l-oħra f’Ruma, minbarra San Pietru, huma San Ġwann Lateran fid-29 ta’ Diċembru; Santa Marija Maġġuri fl-1 ta’ Jannar 2025; u San Pawl Barra l-Ħitan fil-5 ta’ Jannar 2025.
Il-Ġublew tat-Tama, li jiċċelebra l-2,025 anniversarju mit-twelid ta’ Ġesù, se jintemm uffiċjalment fis-6 ta’ Jannar 2026.
Traduzzjoni mħejjija u adattata minn Lara Zammit għal tbissima.mt. It-test oriġinali bl-Ingliż jappartjeni lill-Catholic News Agency.
Fir-ritratt: Il-Bieb Imqaddes tal-Ġublew “jirrappreżenta lil Ġesù, il-bieb tas-salvazzjoni miftuħ għal kulħadd,” innota l-Papa Franġisku. Kreditu: Daniel Ibáñez/EWTN News. Ritratti miġjuba permezz ta’ Catholic News Agency Access for Editors