Nicolás de Cárdenas via Catholic News Agency u CPI Media
Il-Papa Ljun XIV sejjaħ għal jum ta’ sawm u talb għall-paċi nhar il-Ġimgħa, 22 ta’ Awwissu, li jikkoinċidi mal-festa liturġika tar-Reġina tal-Imqaddsa Verġni Marija.
Il-Qdusija Tiegħu għamel it-tħabbira fl-20 ta’ Awwissu waqt it-tislima tiegħu lill-pellegrini li jitkellmu bit-Taljan fi tmiem il-katekeżi għall-udjenza ġenerali , fejn fakkar li l-Madonna, minbarra li hija reġina, hija “invokata wkoll bħala Reġina tal-Paċi”.
“Filwaqt li d-dinja tagħna għadha midruba mill-gwerer fl-Art Imqaddsa, fl-Ukrajna, u f’ħafna reġjuni oħra tad-dinja, nistieden lill-fidili kollha biex jiddedikaw il-jum tat-22 ta’ Awwissu għas-sawm u t-talb, u jitolbu lill-Mulej biex jagħtina l-paċi u l-ġustizzja u biex ixxotta d-dmugħ ta’ dawk li jsofru minħabba l-kunflitti armati li għaddejjin,” qal il-pontifex.
“Marija, Sultana tal-Paċi, interċedi biex il-popli jsibu t-triq għall-paċi,” talab.
Nhar it-Tlieta filgħaxija f’Castel Gandolfo, Ljun XIV esprima t-tama tiegħu għal soluzzjoni għall-kriżi tal-gwerra fl-Ukrajna iżda enfasizza l-ħtieġa li nkomplu “naħdmu bis-sħiħ, nitolbu bis-sħiħ” għall-paċi.
Il-Knisja f’Malta, flimkien mal-Knisja Universali, qed tingħaqad ma’ Papa Ljun XIV f’inizjattiva ta’ fidi b’saħħitha: jum ta’ sawm u talb għall-paċi u l-ġustizzja fid-dinja.
Illum, il-Ġimgħa 22 ta’ Awwissu, il-Papa sejjaħ lill-insara madwar id-dinja biex jiddedikaw dan il-jum għas-sawm u t-talb b’mod speċjali għall-paċi f’żoni milquta mill-kunflitti, fosthom l-Art Imqaddsa, l-Ukrajna, u diversi pajjiżi oħra li għadhom qed ibatu minħabba l-gwerer.
L-Arċidjoċesi ta’ Malta qed tħeġġeġ lill-komunità Nisranija biex tingħaqad f’dan il-mument ta’ talb u solidarjetà, bħala xhieda ta’ tama u impenn lejn il-paċi. Dan il-ġest ta’ fidi huwa wkoll att konkret ta’ għaqda ma’ dawk li jbatu u t-tama li l-ġustizzja tirbaħ fuq il-vjolenza.
“Nitolbu lill-Mulej ifarraġ lil kull min qed ibati kawża tal-gwerer,” kienet it-talba li ġiet imqajma mill-Knisja f’dan il-jum speċjali, hekk kif tkompli l-isfida globali biex tinbena kultura ta’ paċi u rispett bejn il-popli.