Daniel Payne via Catholic News Agency
Nhar Ħamis ix-Xirka, il-Papa Franġisku ħasel saqajn 12-il priġunier f’ħabs f’Ruma, fejn il-pontifikat kompla bi tradizzjoni regolari li jorganizza l-Quddiesa tal-Ikla tal-Mulej fil-penitenzjarji lokali.
Is-Santu Missier qal lill-priġunieri nisa fil-faċilità korrettiva taʼ Rebibbia, li tinsab madwar sitt mili ’l bogħod mill-Belt tal-Vatikan, li Ġesù “qatt ma jgħejja” imma pjuttost “aħna li niddejjaq nitolbu maħfra.”
“Ilkoll għandna l-fallimenti żgħar jew kbar tagħna – kulħadd għandu l-istorja tiegħu. Imma l-Mulej dejjem jistenniena, b’idejh miftuħin, u ma jegħja qatt jaħfer,” qal il-Papa, skont Vatican News.
Il-Papa waqt il-Quddiesa ħasel saqajn 12 mill-priġunieri nisa preżenti. Dawn kienu ta’ “nazzjonalitajiet differenti,” qal il-Vatikan.
Il-Papa imbagħad “iltaqa’ mal-ħabsin u l-ħaddiema tal-penitenzjarju” u rċieva diversi rigali inklużi prodotti mir-razzett tal-kumpless tal-ħabs.
Fis-snin li għaddew, il-Papa Franġisku vvjaġġa lejn ħabsijiet u faċilitajiet oħra f’Ruma u madwarhom biex jaħsel saqajn individwi emarġinati.
Fl-2023 ħasel saqajn 12-il żagħżugħ u żagħżugħa fiċ-ċentru ta’ detenzjoni tal-minorenni Casal del Marmo fil-periferija ta’ Ruma.
Franġisku waqqaf id-drawwa ftit wara l-bidu tal-papat tiegħu. Wara li żar iċ-ċentru ta’ detenzjoni taż-żgħażagħ ta’ Casal del Marmo fl-2013, ippresieda l-Quddies tal-Ħamis Imqaddes f’ċentru għall-persuni b’diżabilità fl-2014, il-Ħabs Kumpless Ġdid ta’ Rebibbia fl-2015, ċentru għal dawk li jfittxu ażil fl-2016, il-ħabs ta’ Paliano fl-2017, il-ħabs storiku ta’ Ruma. Il-ħabs ta’ Regina Coeli fl-2018, u l-ħabs tal-irġiel ta’ Velletri fl-2019.
Is-Santu Missier qabeż it-tradizzjoni fl-2020 minħabba l-pandemija tal-COVID-19.
Traduzzjoni mħejjija u adattata minn Lara Zammit għal tbissima.mt. It-test oriġinali bl-Ingliż jappartjeni lill-Catholic News Agency