Matthew Santucci via Catholic News Agency
Il-Papa Franġisku waqt ir-Regina Caeli nhar il-Ħadd tal-Ħniena Divina nnota li “l-milja tal-ħajja” ma tiġix mill-insegwiment ta’ pjaċir transitorju iżda hija “realizzata f’Ġesù”.
“Biżżejjed li jkollok il-ħajja,” qal il-Papa, “biżżejjed li wieħed jiftaħ għajnejh fuq Ġesù msallab u rxoxt, jiltaqa’ miegħu fis-sagramenti u fit-talb, jagħraf li hu preżenti, jemmen fih, iħalli lilu nnifsu jintmess mill-grazzja tiegħu u jiġi mmexxi mill-eżempju tiegħu biex jesperjenza l-ferħ li jħobb bħalu. Kull laqgħa ħajja ma’ Ġesù tgħinna jkollna aktar ħajja.”
Il-Ħadd tal-Ħniena Divina, imwaqqfa minn San Ġwanni Pawlu II matul is-Sena tal-Ġublew 2000, jiġi ċċelebrat fit-Tieni Ħadd tal-Għid.
Il-Papa fakkar fid-dixxipli, skoraġġuti u mwarrbin wara l-mewt ta’ Kristu, li kienu “għaddejjin mill-iktar mument traġiku fil-ħajja tagħhom”, imma il-miġja ta’ Kristu kienet mument profondament trasformattiv għalihom – wieħed li mhux biss juri l-ħniena tiegħu iżda li bih wiegħed ikollu ħajja ġdida.
“L-Irxoxt ġie u wrihom il-ġrieħi tiegħu,” qal il-Papa. “Kienu sinjali ta’ tbatija u wġigħ u setgħu jqanqlu sentimenti ta’ ħtija, iżda ma’ Ġesù saru kanali ta’ ħniena u maħfra.
“Id-dixxipli raw u missu b’idejhom il-fatt li ma’ Ġesù, il-ħajja tirbaħ; il-mewt u d-dnub huma megħluba. U rċevew d-don tal-Ispirtu tiegħu, li jagħtihom ħajja ġdida, bħala wlied maħbubin, mimlijin ferħ, mħabba u tama.”
Il-Papa Franġisku ppreżenta dan il-messaġġ b’kuntrast man-narrattivi prevalenti tal-lum il-ġurnata dwar x’jagħmel ħajja tajba, filwaqt li osserva li l-ħajja tal-lum hija “tellieqa frenetika biex tgawdi u jkollok ħafna affarijiet”.
Waqt li wissa kontra din il-ħarsa materjalistika, saħaq li “meta wieħed isegwi t-triq tal-pjaċir u l-qawwa, wieħed ma jsibx il-ferħ.”
“Tabilħaqq, ħafna aspetti tal-eżistenza jibqgħu bla tweġiba, bħall-imħabba, l-esperjenzi inevitabbli taʼ wġigħ, taʼ limitazzjonijiet, u taʼ mewt. U allura l-ħolma komuni li lkoll għandna tibqa’ mhux imwettqa,” kompla l-Papa.
Biex nikkumbattu din it-tendenza, l-Papa ħeġġeġ lill-fidili biex jagħmlu l-mistoqsijiet li ġejjin: “Nemmen jien fil-qawwa tal-qawmien ta’ Ġesù, fir-rebħa tiegħu fuq id-dnub, il-biża’ u l-mewt? Inħalli lili nnifsi jkolli relazzjoni miegħu? U nħalli lili nnifsi niġi mqanqal minnu biex inħobb lil ħuti, u nittama kuljum?”
Fi tmiem ir-Regina Caeli, il-Papa għamel l-appell tiegħu għal “paċi dejjiema fl-Ukrajna itturmentata” kif ukoll fil-Palestina u l-Iżrael billi talab lill-mexxejja biex isibu mod kif inaqqsu t-tensjonijiet u biex jinnegozjaw.
Traduzzjoni mħejjija u adattata minn Lara Zammit għal tbissima.mt. It-test oriġinali bl-Ingliż jappartjeni lill-Catholic News Agency