Lara Zammit
Fil-messaġġ tiegħu għar-Randan ta’ din is-sena, il-Papa Franġisku fakkar li r-Randan “huwa staġun ta’ konverżjoni, żmien ta’ libertà”.
Minħabba li r-Randan huwa assoċjat mas-sawm u l-astinenza, huwa komuni li naraw r-Randan bħala żmien ta’ restrizzjoni. Imma, kif ifakkarna l-papa fil-messaġġ tiegħu, ir-Randan m’huwiex perjodu ta’ limitazzjoni iżda ta’ libertà.
Dan għaliex, meta nsumu, aħna qiegħdin nagħmlu sagrifiċċju – qiegħdin nagħżlu li noffru milli għanda biex nagħtu qima lil Alla.
L-etimoloġija tal-kelma “sagrifiċċju” turina bis-sħiħ t-tifsira spiritwali tagħha. Il-kelma “sagrifiċċju” tiġi mill-frażi Latina sacrum facere, li tfisser “jagħmel qaddis, jew sagru.”
Is-sagrifiċċju jqanqal il-qdusija. Meta nissagrifikaw għall-ġid ta’ persuna oħra jew għal Alla, dak is-sagrifiċċju jagħmilna qaddisin. Imma xi jfisser li tkun “qaddis”? Li tkun qaddis huwa li tiġi tixbah lil Alla.
Sagrifiċċju magħmul għall-imħabba jagħmilna qaddisin – jagħmilna aktar nixbhu lil Alla, għax Alla huwa mħabba li ssagrifika lilu nnifsu, li tana lilu nniffsu fuq is-salib.
Din hija waħda mir-raġunijiet għalfejn Alla jħeġġiġna, “Kunu qaddisin, għax jien qaddis” (Levitiku 11:44-45, 19:2, 20:7; 1 Pietru 1:16): aktar ma nidħlu bis-sħiħ fid-dinamika ta’ mħabba u ta’ sagrifiċċju f’din il-ħajja, aktar ma nsiru nixbhu lil Alla, u b’hekk aktar inkunu nistgħu nieħdu sehem fil-ħajja divina ta’ Alla.
B’din il-ħarsa ġdida lejn ir-Randan, l-istaġun isir wieħed li jagħti l-frott, mhux wieħed li fih nidbielu bil-mod.
Is-sagrifiċċji tagħna ta’ kuljum mhumiex piżijiet imma sinjali ta’ mħabba għal Alla li jħobbna.
Filwaqt li għandna nimmiraw li nagħmlu dan is-sena kollha, is-sagrifiċċju huwa speċjalment pertinenti fir-Randan għaliex dan huwa żmien fejn nantiċipaw il-Passjoni u l-Qawmien ta’ Ġesù – l-akbar sinjal ta’ mħabba u sagrifiċċju li għandna.
L-isbuħija ta’ din l-imħabba bejna u bejn Alla hi li din ir-relazzjoni hija unika; l-istaġun tar-Randan se jidher differenti għal kull persuna.
Iżda dak li jgħaqqadna hu li r-Randan jistedinna nneħħu l-affarijiet li jxekkluna mir-relazzjoni tagħna ma’ Alla, u jeħlisna – jagħmilna liberi – biex inħobbuh bis-sħiħ.